Nga e hëna 7 ditë në dispozicion për të gjithë të rriturit që duan të vaksinohen

Ministrja e Shëndetësisë, Ogerta Manastirliu ka bërë me dije se të hënën nis java e vaksinimit të hapur për të gjithë qytetarët mbi 18 vjeç.

Qytetarët që duan të vaksinohen mund të paraqiten me kartën e identitetit në pikën më të afërt të vaksinimit.

“Do të jetë java e parë e hapur e vaksinimit për të gjithë qytetarët +18 vjeç, në të gjitha qendrat shëndetësore, në pikat e vaksinimit masiv, duke shkuar edhe derë më derë”, tha Manastirliu, ndërsa ka ftuar qytetarët +18 vjeç të vaksinohen përgjatë këtyre ditëve.

Duke bërë me dije se ditë të vaksinimit të hapur do të ketë përgjatë gjithë verës, Manastirliu tha se do të vijojë furnizimi me vaksina kundër COVID-19.

Znj. Manastirliu u bëri sërish thirrje qytetarëve që të kenë kujdes të shtuar për shkak të variantit Delta dhe të vaksinohen sa më parë, në mënyrë që ky variant të mos përhapet në vendin tonë.

Pavarësisht sinjaleve për prezencë të variantit Delta në vendin tonë, pas testimit është evidentuar se ende nuk ka infektime me këtë variant.

LEXONI GJITHASHTU:

• Coronavirusi, ministrja Manastirliu përgjigjet për maskat, shkollat dhe mbylljen e kufirit me Italinë
• Dyshime për variantin Delta, ministrja Manastirliu: Presim rezultatet nga Gjermania