Kualifikim i ‘çmendur’ për Vllazninë, shkodranët përmbysin rezultatin në Conference League

Vllaznia ka bërë mrekullinë duke përmbysur rezultatin 3-1 të ndeshjes së parë përballë ekipit nga Bosnja, Siroki Brijeg.

Ndryshe nga ndeshja e parë në Bosnje, në tapetin e “Loro Boriqit” pati tjetër histori ku Vllaznia dominoi për 90 minuta e mbështetur dhe nga tifozeria e zjarrtë shkodrane e cila u rikthye në shkallët e stadiumit pas më shumë se një viti .

Pas një pjese të parë të mbyllur me rezultatin 0-0, shkodranët shfaqën një lojë krejt tjetër në 45-minutëshin e dytë duke triumfuar me rezultatin 3-0.

Pas shënimit të golit të parë, arbitri suedez, Kaspar Sjöberg ndërpreu ndeshjen dhe riktheu lojtarët në dhomat e zhveshjes si pasojë e përdorimit të mjeteve piroteknike në shkallët e stadiumit , lojë e cila vijoi pas pak minutash .

Protagonistët shprehen tejet të gëzuar për këtë rezultat dhe thonë se besuan deri në fund tek ky triumf.

Pas triumfit, festa vijoi jashtë shkallëve të stadiumit dhe në sheshet e qytetit.

Në raundin e dytë të Conference League, Vllaznia do të përballet me Ael Limasol për të vazhduar kështu ëndrrën evropiane.