Protestë për dasmat në Kamëz, pronarët e lokaleve: Ka diferencime, nuk na lejojnë as me 50 persona

Pronarët e lokaleve të dasmave në Kamëz kanë protestuar këtë të premte përballë Ministrisë së Shëndetësisë për heqjen e orës policore dhe lejimin e organizimit të ceremonive martesore.

Sipas tyre, në Kamëz dasmat nuk po lejohen as me 50 persona, ndërsa në zonat përreth saj ato po zhvillohen edhe përtej orës policore.

“Vetëm në Kamëz nuk na lejojnë”, tha një pronar lokali në Kamëz.

“Ne kemi marrë pjesë vetë, ka pasur dasma me 200 vetë, kurse tek ne as 30 veta nuk na lejojnë. Të na jepet e drejta si të gjitha zonave të tjera”, u shpreh një tjetër.

Ata thonë se ky diferencim u ka shkaktuar dëme të pallogaritshme ekonomike. Të gjendur në të tillë situatë, një pjesë e tyre shprehen se po detyrohen të largohen nga Shqipëria.

“Të pallogaritshme dëmet, për këtë një vit e gjysmë kam fituar 720 mijë lekë, që unë i paguaj drita dhe ujë”, u shpreh një pronar lokali në Kamëz.

“Ne kemi bërë investime kolosale, ne taksat i kemi paguar punë apo pa punë, tani ne jemi detyruar të ikim nga Shqipëria”, tha një tjetër.

Pronarët e restoranteve dorëzuan në Ministri kërkesën e tyre për lejimin e dasmave dhe heqjen e orës policore. Ministria thotë se kjo kërkesë është në shqyrtim.

LEXONI GJITHASHTU:

• Lokalet dhe hoteleria me 30% të kapacitetit, pronarët në Vlorë paralajmërojnë protestë