Bizneset në Vlorë protestojnë me himnin kombëtar, policia shoqëron disa persona

Bizneset në Vlorë, kryesisht ato të lokaleve dhe restoranteve përgjatë Lungomares, kanë paralajmëruar se do të mbajnë një protestë ditën e hënë në lidhje me masat anti-COVID.

Ata kërkojnë shtyrje të orarit të mbylljes dhe atë për lejimin e muzikës duke qenë se ndodhen në kulmin e sezonit turistik.

Ndërkohë, një ditë para protestës së paralajmëruar, një pjesë e madhe e lokaleve e kanë mbyllur muzikën në orën 22.00 me himnin kombëtar.

Por gjatë mbrëmjes së diel nuk kanë munguar as incidentet. Pronari i një biznesi dhe një grua janë shoqëruar në komisariat.

Pamjet tregojnë oficerë të policisë që shoqërojnë me forcë një zonjë, ndërsa shumë prej të pranishmëve i dalin në krah duke i kërkuar Policisë që ta lënë të lirë.

Në bazë të masave kufizuese që janë aktualisht në fuqi, të gjitha bizneset duhet të ndërpresin muzikën në orën 22:00, kurse në orën 23:00 çdo aktivitet duhet të jetë i mbyllur.

Gjithashtu që prej 1 korrikut, sipas udhëzimeve të Komitetit të Ekspertëve për masat anti-COVID, baret restorantet dhe hoteleria duhet të punojë me 30 për qind të kapacitetit.

Këto masa sipas drejtuesve të bizneseve po i shtyjnë drejt falimentit pasi vijnë pas një sezoni turistik të cunguar për shkak të pandemisë.

LEXONI GJITHASHTU:

• Lokalet dhe hoteleria me 30% të kapacitetit, pronarët në Vlorë paralajmërojnë protestë
• Rrezik për falimentim, bizneset në Vlorë protestojnë për heqjen e kufizimit të lëvizjes
• Kryeministri Rama kritikon sërish kreun e Bashkisë Vlorë për mbetjet