Riatdhesohen 23 persona në RMV nga kampet e Sirisë, mes tyre 14 fëmijë

23 persona të mbetur në kampet e luftës në Siri dhe Irak janë kthyer në Maqedoninë e Veriut.

Operacioni për riatdhesimin e qytetarëve maqedonas është kryer me sukses për 14 fëmijë, 5 gra dhe 4 pjesëtarë të grupit militiant të shtetit islamik ISIS.

Këta të fundit, u dërguan menjëherë në burg, ndërsa gratë dhe fëmijët janë futur në një karantinë 14-ditore.

“Kundër katër luftëtarëve të huaj terroristë, pas provave të siguruar nga Ministria e Brendshme, Byroja e Sigurisë Publike dhe në koordinim me Agjencinë e Sigurisë Kombëtare, janë paraqitur padi penale. Të tjerë nëse dëshmohet se nuk janë përfshirë në veprime që i nënshtrohen përgjegjësisë penale-juridike, do të fillojë procesi i rehabilitimit”, thuhet në një komunikatë të qeverisë së Maqedonisë së Veriut.

Operacioni i fundit u krye me ndihmën e Ambasadës amerikane në Shkup, bazuar në detyrimet e vendit sipas ligjit ndërkombëtar dhe rezolutave të Këshillit të Sigurimit të Kombeve të Bashkuara.

Sipas Ministrisë së Punëve të Brendshme, rreth 150 shtetas të Maqedonisë së Veriut kanë marrë pjesë në luftërat në Siri dhe Irak, dhe deri tani rreth 100 prej tyre janë rikthyer.

LEXONI GJITHASHTU:

• Riatdhesohen 11 shqiptarë të Kosovës që ndodheshin në zonat e konfliktit në Siri
• Kosova rrezikon të humbë gjyqin 20 mln € me një kompani amerikane, paralajmëron ministrja e Ekonomisë