Vuçiç para takimit me Kurtin: Dorëzimi nuk është një opsion

Presidenti i Serbisë, Aleksandër Vuçiç ka deklaruar para takimit me kryeministrin Albin Kurti në Bruksel, se dorëzimi nuk është një opsion.

Ai ka shtuar se asnjëherë nuk është e këndshme të udhëtosh dhe të qëndrosh në Bruksel kur je duke biseduar me përfaqësues shqiptarë, por sipas tij gjithçka po bëhet për të ruajtur paqen dhe stabilitetin në rajon.

“Kurrë nuk është këndshme të udhëtosh apo qëndrosh në Bruksel kur je duke biseduar më përfaqësues shqiptarë. Sidoqoftë, është e rëndësishme për Serbinë sepse duke vepruar kështu, ne po ndihmojmë njerëzit tanë, duke ruajtur paqen dhe stabilitetin, të cilat janë të një rëndësie thelbësore për përparimin ekonomik të të gjithë Serbisë. Në aeroplan, gjithmonë, ashtu si në ditët e studentëve, azhurnoj materialin dhe përgatitem për takime të vështira. Dorëzimi nuk është një opsion”, ka shkruar Vuçiç në rrjetet sociale.

Më herët, drejtori i të ashtuquajturës zyrë për Kosovën në qeverinë e Serbisë, Petar Petkoviç njoftoi se në takimin e sotëm pala serbe do të ngulmojë në formimin e asociacionit të komunave me shumicë serbe.

Petkoviç, i cili do të jetë në Bruksel si anëtar i delegacionit të Beogradit, tha se do të insistojnë në çështje të tjera të rëndësishme, përfshirë çështjen e të zhdukurve.

Nga ana tjetër pala kosovare pretendon se janë nënshkruar disa marrëveshje që nuk respektohen plotësisht nga Serbia.

LEXONI GJITHASHTU:

• Sot takimi Kurti-Vuçiç në Bruksel, pala serbe kërkon asociacionin e komunave me shumicë serbe
• Takimi Kurti-Vuçiç, faza tjetër e dialogut në Bruksel më 19 korrik
• Opozita në Kosovë e cilëson dështim të plotë qëndrimin e Kurtit përballë Vuçiç-it