Lokalet e Vlorës i përgjigjen kryeministrit: Policia na heq klientët nga tavolinat, por shëtitorja mbetet plot

Sipërmarrësit e lokaleve në Vlorë e cilësojnë të palogjikshëm orarin e kufizimit të aktivitetit dhe për këtë kërkojnë që ky orar të shtyhet të paktën me nga dy orë.

Kryetari i Shoqatës së Bareve dhe Restoranteve, Ervin Sota, tha për Euronews Albania se kërkesat e tyre janë për të garantuar “punën e ndershme” dhe se sipërmarrësit kërkojnë që ora e lejuar e aktivitetit të shkojë së paku në 02:00 nga 00:000 dhe ajo e muzikës deri në 00:00 nga 22:00 që është aktualisht.

Kryeministri Edi Rama teksa komentoi protestën në Twitter tha se ora e muzikës do të zgjatet deri në 23:00 por vetëm pas datës 20 korrik, ndërsa theksoi se “Lungomare ka ndotje akustike”.

Në lidhje me këtë koment Sota tha se ka një keqkuptim. Sipas tij në “Lungomare” nuk ka ndotje akustike dhe se për këtë mund të merren masat konkrete.

“[…] ne kërkojmë zgjerim fashës së muzikës deri në 00:00, të vijnë po ashtu ta kontrollojnë, dhe lejim të biznesit deri në orën 2 sepse nuk është e logjikshme që të vijë policia të heqë klientët nga tavolinat dhe shëtitorja ndërkohë mbetet plot,” – u shpreh Sota.

“Deklarata e kryeministrit s’ka lidhje fare me COVID-in, nëse flasim për ndotje akustike atëherë flasim për një kohë normale,” – vijoi Sota, i cili përgënjeshtroi lajmin e publikuar në media, që thoshte se pas komentit të kryeministrit protesta qe ndërprerë.

“Jemi qytet turistik kërkojmë shërbim të shëndetshëm, me kushte normale dhe jo me absurditete që s’kanë lidhje logjike fare me kushtet e COVID-it,” – theksoi kryetari i shoqatës së bareve.

LEXONI GJITHASHTU:

• Lokalet mbyllur për protestë, Rama thekson se muzika do vijojë të ndalohet në mbrëmje