Nismë Turqi-SHBA për njohjen e Kosovës, Erdogan: Do të bisedoj me Biden në Asamblenë e OKB-së

Në kohën kur në Bruksel dialogu Kosovë Serbi vijon të karakterizohet nga tensionet dhe mosmarrëveshje, Presidenti i Turqisë Recep Tayyip Erdogan është gati të ndërmarrë një fushatë të re për të siguruar që sa më shumë vende të njohin Kosovën si shtet.

Dhe këtë proces ai beson se do ta realizojë në bashkëpunim me kreun e Shtëpisë së Bardhë.

Siç raporton agjencia e lajmeve Reuters,  në një deklaratë për mediat Erdogan u shpreh se shpreson se çështjen e njohjes ndërkombëtare të Kosovës do ta hapë në bisedimet me presidentin amerikan, Joe Biden, gjatë Asamblesë së Përgjithshme të Kombeve të Bashkuara, e cila mblidhet në vjeshtë.

Erdogan theksoi se do të propozojë një punë të përbashkët mbi këtë çështje, për të rritur numrin e vendeve që e njohin Kosovën.

Kosova ka shpallur pavarësinë në vitin 2008, por sipas listës së publikuar nga  Ministria e Jashtme të Kosovës, janë 117 vende që e njohin deri më tani  pavarësinë.

Serbia, me Marrëveshjen e Uashingtonit të 4 shtatorit, 2020, është zotuar se  do të  ndalë fushatën për tërheqjen e njohjeve të Kosovës, ndërsa Kosova ka marrë mbi vete obligimin që të mos aplikojë për anëtarësim në organizata ndërkombëtare për një vit.

LEXONI GJITHASHTU:

• Kurti: Vuçiçit i propozova deklaratë paqeje me 6 pika
• Tension në takimin e dytë me Vuçiç, Kurti akuzon Serbinë për tre gjenocide ndaj shqiptarëve