Mbi 90 raste me COVID përpara nisjes së Lojërave Olimpike, Guineja anulon pjesëmarrjen

Guineja ka vendosur të bojkotojë Lojërat Olimpike si rrjedhojë e rrezikut nga infektimi i sportistëve me variantet e reja të COVID-19.

Mbi 90 persona, mes të cilëve sportistë dhe anëtarë stafesh sportive, kanë rezultuar pozitivë me COVID-19 ditët e fundit, teksa Lojërat Olimpike nisin zyrtarisht të premten.

Kjo ka bërë që qeveria e shtetit afrikano-perëndimor të ndalojë përfaqësuesen e saj për të shkuar në Japoni.

“Për shkak të përhapjes së varianteve të ndryshme të COVID-19 dhe shqetësimit mbi shëndetin e sportistëve, qeveria ka vendosur të anulojë pjesëmarrjen e Guinesë në Lojërat e Tokios,” – tha në një deklaratë për shtyp ministri i Sportit Sanoussy Bantama Sow.

Situata paraqitet shqetësuese nga autoritete japoneze pasi të enjten Tokio raportoi rreth 2 mijë raste të reja me infeksion, numri më i lartë ditor në gjashtë muajt e fundit.

Dymbëdhjetë sportistë dhe anëtarë stafesh të përfaqësueseve rezultuan pozitivë të mërkurën në Fshatin Olimpik në Tokio. Pjesë e tyre ishin sportistë nga Holanda, Republika Çeke, SHBA dhe Rusia.

Qeveria japoneze është kritikuar shumë për këmbënguljen për t’i zhvilluar Lojërat Olimpike me patjetër pavarësisht situatës së vështirë me pandeminë.

LEXONI GJITHASHTU:

• Regjisori i ceremonisë hapëse të Lojërave Olimpike shkarkohet për përqeshje të Holokaustit