Vazhdimësia e Reformës në Drejtësi, Soreca: Do të vëzhgojmë me kujdes angazhimin e parlamentit të ri

“Zbatimi i reformës në drejtësi përfaqëson një epokë të re në sundimin e ligjit në Shqipëri. Është një nga hapat më të rëndësishëm të ndërmarrë nga vendi në 30 vite që nga rënia e diktaturës,” deklaroi ambasadori i BE në vendin tonë, z. Luigi Soreca.

Duke folur nga tryeza e zyrtarëve të lartë që shënoi 5-vjetorin e Reformës në Drejtësi, ku u diskutua dhe strategjia e re për vitin 2021-2025, kreu i Delegacionit Europian në Shqipëri shtoi se pas 5 vitesh punë, tani rëndësi thelbësore merr vazhdimësia e reformimit.

“Objektivi kryesor për 4 vitet e ardhshme është puna edhe më e fortë për të garantuar zbatimin e reformës. Parlamenti i ri në shtator do të ketë rëndësi të madhe dhe angazhimi i tij do të shihet me vëmendje,” tha z. Soreca.

Sipas ambasadorit, reforma në drejtësi ka hapur një derë për Shqipërinë në BE dhe se vazhdimësia e saj ishte thelbësore për të bindur vendet anëtare, por edhe për t’i dhënë qytetarëve shqiptarë drejtësinë e shumëkërkuar.

“Më lejoni ta shfrytëzoj rastin për të kërkuar më shumë forcë, më shumë bashkëpunim dhe konsultim, e më tepër lidership nga të gjitha anët politike, institucionet dhe aktivistët e shoqërisë civile,” nxiti ambasadori.

“Vazhdimësia e reformimit të gjyqësorit është sipas meje prioriteti i prioriteteve. Është gjithashtu e rëndësishme të sigurohen disa nga përfitimet kryesore të reformës në drejtësi, si pavarësia dhe integriteti i sistemeve gjyqësore, në muajt e ardhshëm kur disa nga institucionet e tjera do të nisin nga puna,” tha z. Soreca.

Ambasadori nënvizoi se faza e dytë duhet të sigurohet që ta afrojë më shumë drejtësinë shqiptare me atë europiane.

“Faza e zbatimit në këto 5 vite na ka bërë t’ia kuptojmë kompleksitetin reformës. Zbatimi i saj nuk ka qenë i lehtë, as ideal por këto 5 vjet kanë nxjerrë në pah domosdoshmërinë e saj,” u shpreh ambasadori Soreca.

Më 22 korrik 2016 Kuvendi miratoi me 140 vota ndryshimet kushtetuese që i dhanë nisjen reformës që do të shqyrtonte të gjithë zyrtarët e sistemit të drejtësisë. Prej asaj kohe, në mbështetje të ekspertëve nga SHBA dhe BE, janë verifikuar rreth 420 gjyqtarë dhe prokurorë në procesin e njohur ndryshe edhe si “vetting”.

Komisioni i Pavarur i Kualifikimit ka konfirmuar 174 gjyqtarë e prokurorë, ndërsa 155 janë shkarkuar, 55 janë dorëhequr, ndaj 25 të tjerëve nuk është dhënë ende vendimi përfundimtar, 8 kanë marrë vendim për pushim procesi ndërsa 3 janë pezulluar për 1 vit nga detyra. Aktualisht dhjetëra zyrtarë të drejtësisë mbeten në pritje të procesit të vetingut.

LEXONI GJITHASHTU:

• Zyrtarët e lartë të drejtësisë propozime për strategjinë e reformës 2021-2025
• Ambasadorja Kim: Koha që shqiptarëve t’u kthehet besimi te drejtësia
• Reforma në drejtësi, strategjia për periudhën 2021-25 ka kosto deri në 57 mln euro
• ‘Stoku i dosjeve i papërballueshëm’, kryeprokurori Çela: Situata do përkeqësohet në vjeshtë