‘Dy shtete, garanci për lirimin e Hashim Thaçit’, thotë avokati i ish-presidentit

Avokati mbrojtës i ish-presidentit Hashim Thaçi, u shpreh para Gjykatës Speciale në Hagë se disa shtete janë në gjendje të dalin garant për lirimin e tij.

Gregory Kehoe kritikoi Prokurorinë Speciale për mohimin e mundësisë së lirimit të Thaçit.

Po ashtu, avokati amerikan i Hashim Thaçit shtoi se Prokuroria e Specializuar e ka hequr tërësisht kontekstin kohor se kur planifikonte të niste gjykimin.

Korrespondenti i Euronews Albania në Kosovë, Kosovë Gjoci raportoi se avokati mbrojtës i ish-presidentit Thaçi tha se janë dy shtete që janë në gjendje të ofrojnë garanci për lirimin e tij nga paraburgimi.

“Këto janë shtete anëtare të NATO-s dhe nga burime ende të pakonfirmuara zyrtarisht thuhet se bëhet fjalë për Slloveninë dhe Kroacinë.

Ankesa e avokatit lidhej me mungesën e besimit të Gjykatës në Hagë ndaj këtyre shteteve që janë anëtare të NATO-s dhe siç tha, e kanë kërkuar ekzistencën e kësaj gjykate”, raportoi korrespondenti Gjoci.

Zyra e Prokurorit të Specializuar me seli në Hagë ka ngritur akuza ndaj ish-presidentit Thaçi dhe 3 ish-eksponentëve të UÇK për krime kundër njerëzimit dhe krime lufte, përfshirë vrasje, zhdukje me dhunë të personave, persekutim dhe tortura.

Disa muaj më parë mbrojtja e ish-presidentit të Kosovës, Hashim Thaçi dorëzoi në Hagë një ankesë ku kërkohej heqja e aktakuzës ndaj tij, pasi theksohej se ka “mungesë të juridiksionit”.

Mbrojtja gjithashtu thekson se Thaçit i janë shkelur të drejtat për një dëgjim të drejtë dhe të paanshëm publik si dhe për një gjykim të drejtë, brenda një kohe të arsyeshme.

LEXONI GJITHASHTU:

• Gjykata e Hagës refuzon lirimin e Hashim Thaçit dhe 3 ish-luftëtarëve të UÇK
• Kërkohet lirimi ish-komandantëve të UÇK-së, Avokati i Thaçit: Ende nuk është përcaktuar për çfarë akuzohen