‘Hap i rëndësishëm për reformën në drejtësi’, ambasadorja Kim përshëndet emërimin e anëtarit të tetë të Gjykatës së Lartë

Ambasadorja Yuri Kim e ka cilësuar një hap të rëndësishëm për zbatimin e reformës në drejtësi emërimin e anëtarit të Gjykatës së Lartë, Artur Kalaja.

Përmes një postimi në Twitter kryediplomatja amerikane shprehet se emërimi i anëtarit të tetë të Gjykatës së Lartë i hap rrugën plotësimit me 10 anëtarë të kësaj gjykate, çka do të mund të zgjidhë edhe ngërçin e krijuar në Gjykatën Kushtetuese.

“Hap i rëndësishëm drejt zbatimit të reformës në drejtësi: gjyqtari i 8-të i emëruar në Gjykatën e Lartë, i 9-ti pritet të zgjidhet shumë shpejt. Sapo të emërohet i 10-ti, Gjykata e Lartë do të ketë kuorumin e nevojshëm për të emëruar 3 gjyqtarë të tjerë për Gjykatën Kushtetuese. Falënderojmë Këshillin e Lartë Gjyqësor dhe Presidencën që e bënë këtë të mundur”, shkruan ambasadorja në Twitter.

Presidenti Meta dekretoi sot emërimin e Artur Kalasë si gjyqtar të Gjykatës së Lartë.

Kalaja ishte një nga tre kandidaturat që shfaqën “integritet të lartë etik dhe profesional” në procedurën e nisur në muajin korrik nga Këshilli i Lartë Gjyqësor (KLGJ) për plotësimin e vendeve bosh në Gjykatën e Lartë.

Bashkë me të kandiduan Asim Vokshi dhe Gent Medja. KLGJ i propozoi Presidentit ta emëronte Kalanë gjyqtar në fushën e së drejtës civile.

LEXONI GJITHASHTU:

• Presidenti Meta dekreton emërimin e Artur Kalasë në Gjykatën e Lartë
• Gjykata e Lartë nis procedurat për plotësimin e tre vendeve vakante në Gjykatën Kushtetuese