Shqipëria merr mbi 67 mijë doza Pfizer përmes Covax

Shqipëria ka marrë një sasi prej 67 860 doza vaksinash Pfizer përmes instrumentit Covax. Qeveria shqiptare ka deklaruar se ka paguar 3.9 milionë euro ndaj mekanizmit COVAX për të siguruar rreth 1 milionë vaksina.

“67,860 doza të vaksinës Pfizer sapo kanë mbërritur në Aeroportin “Nënë Tereza”, duke e çuar në 1,679,410 sasinë e vaksinave anticovid të mbërritura në vend. Kjo sasi e vaksinave Pfizer u sigurua nga financimi i qeverisë shqiptare përmes instrumentit Covax, nga kontrata direkte me kompaninë si dhe nga mbështetja e Bashkimit Europian”, shprehet kryeministri Rama.

Mekanizmi COVAX, përbëhet nga Koalicioni Inovacione të Gatishmërisë Epidemike (CEPI), Aleanca për Vaksinat – Gavi, Organizata Botërore e Shëndetësisë dhe Fondi i Emergjencës i Kombeve të Bashkuara për Fëmijët (UNICEF).

Prej muajit prill 2020, kur u ndërmor nisma COVAX, rreth 190 shtete janë bërë pjesë e mekanizmit që synon shpërndarjen e rreth 2.7 miliardë vaksinave.