Zyrtarët e arrestuar për tenderin e uniformave të policisë kërkojnë lirimin nga burgu

Nëntë zyrtarët e arrestuar për abuzim me tenderin e uniformave të policisë pretendojnë se nuk ka arsye që të qëndrojnë në burg. Ata pritet të dalin para gjykatës më 30 korrik, ku do të apelojnë masën e sigurisë për të kërkuar lehtësimin e saj.

Zyrtarët dhe ish-zyrtarët u arrestuan në fillim të korrikut, pasi akuzohen nga SPAK se kanë shkelur rregullat e prokurimit publik, barazinë në tenderë dhe kanë shkaktuar dëm ekonomik buxhetit të shtetit.

Nga hetimet e SPAK rezulton se zyrtarët e Ministrisë së Brendshme kanë ndryshuar sasinë e uniformave, që do të merrnin, por nuk kanë ndryshuar çmimin e tenderit prej 2.8 miliardë lekësh në dokumente.

Gjithashtu pati ankesa nga vetë efektivët për cilësinë e uniformave.

Sadedin Fishta, kreu i sindikatës së policisë tha më herët për Euronews Albania se “çmimi shumë më i lartë, cilësia më e dobët”.

Nëse shpallen fajtorë për veprën penale, 9 të akuzuarit rrezikojnë deri në tre vite dënim sipas nenit 258 të Kodit Penal.

Nga hetimet deri tani kanë dalë në pah dhe dy zyrtarë të cilët nuk e kanë firmosur tenderin e cilësuar si korruptiv.

LEXONI GJITHASHTU: 

• Tenderi 25 milionë euro për uniformat, policët ankohen për cilësinë e dobët të materialit
• Hetimet e SPAK për abuzimin me tenderat nga 9 zyrtarët: Kompani fiktive dhe ndryshime çmimesh
• Prokuroria kërkon të kthejë në bashkëpunëtorë të drejtësisë të arrestuarit për tenderin e uniformave, mëson Euronews Albania