Gjykata e Posaçme vendos se Fatmir Mediu nuk do të rihetohet për Gërdecin

Gjykata e Posaçme hodhi poshtë kërkesën për rihapjen e hetimeve për ish-ministrin e Mbrojtjes Fatmir Mediu për shpërthimin e Gërdecit në vitin 2008, ku humbën jetën 26 persona dhe u plagosën mbi 100 të tjerë.

Rihetimi i Fatmir Mediut u kërkua nga SPAK, pasi e akuzon si një nga ish-zyrtarët përgjegjës për tragjedinë e Gërdecit.

Kërkesa e SPAK erdhi pas depozitimit të kërkesës së Feruzan Durdaj dhe Zamira Durdaj, prindër të një prej viktimave të Gërdecit që humbi jetën në moshën 7-vjeçare. Sipas tyre, çështja “Gërdeci” është hetuar nga një ‘bandë’, ndaj kërkuan që të vendoset drejtësi.

Në njoftimin e Gjykatës së Posaçme, të bërë nga gjyqtari Erjon Çela, thuhet se “Kundër këtij vendimi mund të bëhet ankim nga Prokuroria, në Gjykatën e Posaçme të Apelit për Korrupsionin dhe Krimin e Organizuar, brënda 15 ditëve, afat i cili fillon nga dita e nesërme e njoftimit të vendimi”.

LEXONI GJITHASHTU: 

• Shpërthimi në Gërdec, më 27 korrik seanca në GJKKO për Fatmir Mediun
• Gjykata e Lartë cakton Ilir Pandën relator për “Gërdecin”, do të vendosë nëse do ketë rihetim
• Spartak Ngjela: Organet e reja do të vendosin drejtësi, hapja e dosjes së ‘Gërdecit’ shenja e parë