Kreu i SPAK për Euronews Albania: Do të apelojmë vendimin e gjykatës për Fatmir Mediun

Kreu i SPAK, Arben Kraja deklaroi për Euronews Albania se do të apelojnë vendimin e Gjykatës së Posaçme për moshapjen e hetimit ndaj ish-Ministrit të Mbrojtjes, Fatmir Mediu.

Rihetimi i kërkuar nga SPAK pas kërkesës së bërë nga familjarë të një prej viktimave të Gërdecit, u rrëzua këtë të martë nga gjyqtari Erjon Çela i cili argumentoi se nuk kishte prova të mjaftueshme dhe se hetimet nuk mund të hapen pas 10 vitesh kur Mediu nuk ka pasur imunitet gjatë kësaj kohe.

Pyetur nga Euronews Albania, Kraja konfirmoi se sipas procedurave, pas 15 ditësh do të ankimohet vendimi i Gjykatës së Posaçme.

Feruzan Durdaj dhe Zamira Durdaj, prindër të një prej viktimave të Gërdecit që humbi jetën në moshën 7-vjeçare pretendojnë se çështja “Gërdeci” është hetuar nga një ‘bandë’, ndaj kërkojnë të vendoset drejtësi.

Nisur nga kjo SPAK kërkon të hapen hetimet që u mbyllën në vitin 2009 për shkak të imunitetit të Mediut si deputet. Shpërthimi i Gërdecit shkaktoi 26 të vdekur dhe më shumë se 100 të plagosur.

LEXONI GJITHASHTU: 

• Dy argumentet e gjyqtarit për moshapjen e hetimit të Fatmir Mediut
• Gjykata e Posaçme vendos se Fatmir Mediu nuk do të rihetohet për Gërdecin