Prokuroria e Posaçme mbyll hetimet për ish-gjyqtaren e Krujës dhe 8 të arrestuarit e tjerë

Prokuroria e Posaçme ka mbyllur hetimet për ish-gjyqtaren e Krujës, Enkelejda Hoxha, e cila akuzohet për korrupsion.

Pjesë e dosjes hetimore është edhe avokati Aldo Tabaku dhe 7 persona të tjerë, të cilët u vunë në pranga pas një operacioni të ndërmarrë nga SPAK më 11 shkurt të këtij viti.

Sipas prokurorisë personat janë përfshirë në një skemë kriminale të favorizimit dhe lirimit të të burgosurve nga Gjykata e Krujës.

SPAK ka të provuar dy raste të korrupsionit me këtë skemë dhe sqaron se vlerat monetare që jepeshin nga të burgosurit, nëpërmjet familjarëve të tyre shkonin nga 6 mijë deri në 12 mijë euro.

Po kështu, në dosjen e SPAK janë një sërë përgjimesh dhe vëzhgimesh ambientale që implikojnë të hetuarit, ndërsa vetë të akuzuarit kanë mbajtur qëndrim mohues.

Enkelejda Hoxha akuzohet se i dha lirinë personazheve të njohur të botës së krimit, mes të cilëve Genc Tafili, Hekuran Billa edhe Indrit Dokle.

Ajo ka kërkuar disa herë nga gjykata që të hetohet në gjendje të lirë, por kërkesat janë refuzuar.

Sakaq, më 17 mars Këshilli i Lartë i Gjyqësorit vendosi të shkarkojë nga detyra Enkelejda Hoxhën duke pranuar kërkesën e ILD-së.

LEXONI GJITHASHTU:

• Apeli i GJKKO-së lë sërish në qeli gjyqtaren e Krujës, Enkelejda Hoxha
• Refuzohet për herë të katërt ndryshimi i masës së sigurisë për ish-gjyqtaren Enkelejda Hoxha
• KLGJ shkarkon nga detyra gjyqtaren Enkelejda Hoxha