Gjykata lë në burg Fatos Tushen

Gjykata e Apelit ka vendosur të lërë në burg kryetarin e Bashkisë Lushnjë, Fatos Tushe.

Vendimi u mor të mërkurën pasi Tushe kërkoi të gjykohej në gjendje të lirë për arsye shëndetësore. Për të lehtësuar masën e sigurisë, kryebashkiaku ofroi dhe garanci pasurore.

Gazetari i Euronews Albania Eni Ferhati raportoi se seanca në Gjykatën e Apelit ka zgjatur rreth 4 orë.

“Tashmë ngelet vetëm Gjykata e Lartë shpesa e ish-kryetarit të Bashkisë Lushnjë për të përfituar një masë të butë sigurie,” – tha Ferhati ndërsa sqaroi se në qeli me të do të mbeten edhe të arrestuarit e tjerë për tenderin abuziv.

Para gjyqtares Nertina Koka, Tushe deklaroi se nuk ka asnjë lidhje me tenderin e kanalit vaditës, pasi ent prokurues nuk ka qenë Bashkia Lushnjë drejtpërdrejtë por Drejtoria e Punëve Publike.

Akuza që rëndon ndaj tij është shpërdorim detyre. Së bashku me disa vartës në bashki, Tushe dyshohet të ketë abuzuar me tenderin e pastrimit të kanalit vaditës në fshatrat e zonës.

Kryetari i Bashkisë Lushnjë u arrestua në fillim të korrikut pas një operacioni të nisur me urdhër të SPAK.

LEXONI GJITHASHTU: 

• GJKKO vendos sot nëse ish-kryebashkiaku i Lushnjës do të gjykohet në qeli
• Ish-kryebashkiaku i Lushnjës, Fatos Tushe kërkon të lirohet nga burgu për arsye shëndetësore
• “Fatos Tushe do të përjashtohet nga PS”, Rama paralajmëron kryebashkiakët për prokurimet publike