4.9% rritja ekonomike globale për 2022, parashikon FMN

Ekonomia botërore po shkon drejt normalizimit, por ritmi i rritjes do të shihet me hapat e vaksinimit.

Fondi Monetar Ndërkombëtar, ka përditësuar raportin e prillit, duke rritur parashikimin për rritjen globale ekonomike në vitin 2022, në 4.9 %, ndërsa ka mbajtur të pandryshuar parashikimin për 2021-n.

Qasja në vaksina është shfaqur si linja kryesore, përgjatë së cilës rimëkëmbja globale ndahet në dy blloqe: ato që mund të presin normalizimin e mëtejshëm dhe ato që do të përballen ende me infeksione dhe masa kufizuese.

Duke analizuar procesin e vaksinimit, ekonomistja e FMN-së, Gita Gopinath, tha se Europa, SHBA dhe Azia Qendrore, do të kenë rritje të fortë ekonomike, e pasqyruar kjo te parashikimi për 2022-shin.

Ndërkohë, për ekonominë shqiptare FMN nuk ka nxjerrë ende përditësimin, por me ecurinë pozitive në pjesën e parë të vitit dhe me raportin e prillit, PBB parashikohet të rritet rreth 4%, për t’u ngadalësuar në vitin 2022 në 3.5%.

Në rajon, Shqipëria kishte rënien më të ulët pas Serbisë në vitin 2020, ndërsa shteti ballkanik më i goditur ishte Mali i Zi, me -15.2%.

LEXONI GJITHASHTU:

• Të rishikohen të gjitha kontratat koncesionare, thotë eksperti i ekonomisë
• Raporti i DASH: Korrupsion në gjyqësor dhe prokurime, koncesionet problematike