Kuvendi i Kosovës miraton rishikimin e buxhetit

Kuvendi i Kosovës, ka miratuar rishikimin e buxhetit. Me 69 vota pro ligjin mbi ndarjet buxhetore për buxhetin e Kosovës për vitin 2021, ka kaluar pavarësisht kundërshtive të forta që ka pasur nga ana e opozitës.

Debatet të forta ka pasur edhe në Komisionin e Ekonomisë, ku deputetë e Lidhjes Demokratike të Kosovës, Partisë Demokratike dhe Aleancës për Ardhmërinë e Kosovës, kundërshtuan kryesisht pikën për rritjen e huas, së parashikuar nga qeveria për zbutjen e dëmeve të pandemisë në ekonomi.

Shumica parlamentare miratoi vetëm dy amendamente të propozuara nga partitë opozitare. Për këtë arsye, partitë opozitare nuk morën pjesë në vendimmarrje.

Ishte amendamenti i deputetes së AAK-së, Albena Reshitaj, i plotësuar dhe ndryshuar nga komisioni për Buxhet që fliste për nisjet e ndërtimit të një shkolle në fshatin Samadrexhë në Suharekë.

Megjithëse amendamenti i saj në tërësi nuk kaloi, deputetja opozitare tha se është e rëndësishme që punimet për vitin 2021 të fillojnë në këtë shkollë.

Mazhoranca përkrahu edhe amendamentin e deputetes së PDK-së, Blerta Deliu për ndërtimin e çerdhes për fëmijë në komunën e Skenderajt. “Ndërtimi i çerdhes për fëmijë në komunën e Skenderajt në shumën e planifikuar prej 80 mijë eurosh për vitin 2021, të shtohet shuma prej 50 mijë eurosh”, tha ajo.