Në 2023 nuk do të ketë kufij mes Shqipërisë-RMV-Serbisë, thotë Vuçiç

Presidenti i Serbisë Aleksandër Vuçiç në “Forumin Ekonomik për bashkëpunim Rajonal” që po zhvillohet sot në Shkup deklaroi se Shqipëria, Maqedonia e Veriut dhe Serbia duhet të jenë të bashkuara për të rritur edhe nivelin ekonomik mes vendeve.

Gjatë fjalës së tij, z. Vuçiç theksoi se duhet të lëmë pas të kaluarën dhe duhet të shikojmë drejt të ardhmes me qëllimin që qytetarët e tri vendeve të jetojnë më mirë.

Presidenti serb theksoi se një nga synimet kryesore është që më 1 janar të 2023 të mos ketë kufij mes tre vendeve në aspektin e lëvizjes së lirë të qytetarëve dhe mallrave.

“Njëri kusht është që të ndërtojmë besimin e ndërsjellët. Kushti i dytë është që të shohim nëse qeveritë tona të realizojnë shpejt këto rezultate. Nëse do mund t’i tejkalojmë të gjitha këto dobësitë e administratës tonë apo jo dhe nëse mund të bëjmë këtë në 1 janar 2023, ne nuk do të kemi kufinj mes vendeve tona. Kalimet kufitare do të ekzistojnë, por nuk do të ekzistojnë për qytetarët tanë”, theksoi z. Vuçiç.

Kosova, Bosnjë-Hercegovina dhe Mali i Zi nuk kanë marrë një ftesë për të marrë pjesë në “Forumin Ekonomik për bashkëpunim Rajonal” që po zhvillohet sot në Shkup.

Ndërkohë, nga kryeministri Edi Rama u ripërsërit ftesa për tri vendet që të marrin pjesë në këtë nismë.