SPAK përfshihet në hetimet për katër sasitë e drogës kapur ngarkesave të “Alba Exotic Fruit”

Autoritetet shqiptare besojnë se pas sasive të shpeshta të kokainës kapur kompanive që importojnë fruta qëndron një bandë e narkotrafikut. Për këtë SPAK është bërë pjesë e hetimeve, sidomos për rastet e fundmt në ngarkesat e kompanisë “Alba Exotic Fruit”.

Kjo u bë me dije nga burime për Euronews Albania pasi të enjten në ngarkesat e kësaj kompanie policia kapi kokainë për herë të tretë brenda këtij muaji.

Në total janë rreth 25.5 kilogramë kokainë të kapura në tre kontejnerë të ndryshëm, teksa edhe në vitin 2019 në kontejnerët që mbanin porosi të “Alba Exotic Furit” u gjetën 137 kilogramë kokainë.

Itinerari i njëjtë, nga Ekuadori me destinacion fundor portin e Durrësit, ka ngritur dyshimin se pas kësaj linje të drogës qëndron një grup i strukturuar kriminal. Hetuesit janë të bindur se të tria ngarkesat e kapura gjatë muajit korrik janë nisur në të njëjtën kohë.

Veprimtaria e dyshimtë e kompanisë “Alba Exotic Fruit”, me seli në Tiranë, ka bërë që policia e Durrësit të marrë autorizim për të bastisur çdo kontejner të saj që mbërrin në port.

Në vitin 2019, gjatë një operacioni policor, ku qe përfshirë antidroga amerikane, policia greke dhe ajo shqiptare, sasia prej 137 kilogramë që iu gjet kontejnerëve të “Alba Exotic Fruit” në portin e Pireut u zëvendësua me oriz të presuar dhe u la të vijonte për në Durrës ku u mbajt në vëzhgim deri sa tre persona u munduan ta tërhiqnin atë.

Policia ndërhyri, por arrestoi vetëm dy prej tyre. Gentian Malindi, i dyshuar si personi kryesor pas ngarkesës, mundi të largohej dhe mbetet ende në kërkim.

Asokohe aksioneri kryesor i kompanisë “Alba Exotic Fruit”, Eduart Dauti, mohoi të kishte lidhje me drogën. Ai këmbënguli se mbante përgjegjësi vetëm për mallin e porositur, frutat.

Dy vite më vonë, policia e ka shpallur në kërkim Dautin dhe ka arrestuar ortakun e tij Barjon Gumeni, i cili gjithashtu ka mohuar të ketë lidhje.

Për ngarkesat e kapura me drogë Euronews Albania i është drejtuar më herët kompanisë për të marrë një koment, por deri në publikimin e këtij lajmi nuk mori përgjigje.

LEXONI GJITHASHTU:

• Policia kap sërish kokainë në ngarkesat e kompanisë “Alba Exotic Fruit”
• U kap me 324 kg kokainë në portin e Durrësit, gjykata lë në qeli shoferin e kamionit
• 613 kg kokainë në banane, Apeli lë në fuqi vendimin për Arbër Çekajn
• Një shqiptar pas grupit kolumbian që dërgonte kokainë në SHBA përmes fluturimeve “charter”