Xhaz dhe rock në Shkodër, të rinjtë e Ballkanit thyejnë tabutë e kufijve me muzikë

Muzika nuk ka kufij politikë as kulturorë dhe kjo frazë zë vend më së miri në Akademinë e Xhazit në qytetin e Shkodrës. Të rinj nga i gjithë Ballkani janë bërë bashkë duke hequr barrierat mes tyre për hir të muzikës, e cila përmes tingujve bashkon popujt.

Renato Sakica, nga Prizreni është vetëm 14 vjeç dhe ka prej 8 vitesh që ushtron fizarmonikën.

Renato vlerëson së tepërmi këtë eksperiencë dhe njohjen me kolegët e tij nga Ballkani, përfshirë dhe Serbinë.

Për Marko Zhojeviç, nga Serbia është hera e parë që vjen në Shkodër.

Marko shprehet se ka takuar në akademi miq shumë të mirë.

“Kam që nga e hëna në Shkodër dhe po ja kaloj shumë mirë këtu. Këto ditë kam mësuar shumë gjëra rreth dinamikës dhe gjëra si këto. Më pëlqen shumë Shkodra dhe është hera e parë që jam këtu, më pëlqejnë shumë vajzat. Unë luaj në instrumentin e akordit dhe pak në piano. Kam shoqëri me të gjithë këtu, edhe me ata nga Kosova, janë shokë shumë të mirë”, thotë i riu nga Serbia.

Instrumentistët e tjerë nga Mali i Zi dhe Italia vlerësojnë takimin mes shumë nacionalitetesh si një mundësi për të mësuar dhe miqësuar mes tyre.

“Kjo është hera e parë këtu, të themi që ndihem shumë mirë me grupin e djemve, është krijuar menjëherë bashkëpunimi, është një eksperiencë shumë e bukur. Ka një shumëllojshmëri nacionalitetesh këtu; vijnë nga Kosova, Serbia, Mali Zi. Unë jam italian, por vij nga Bullgaria”, thotë një instrumentist italian.

Florian Jakaj, drejtues i Akademisë thotë se është viti i pestë i kësaj akademie që organizohet në Shkodër. Sipas tij, muzika depërton kufijtë dhe bashkon popujt.