Qeveria e Kosovës konfirmon për Euronews Albania bisedimet me SHBA për afganët

Qeveria e Kosovës konfirmoi sot për Euronews Albania se ka zhvilluar bisedime me SHBA-të për të strehuar zyrtarë afganë.

Shefi i stafit të kryeministrit Albin Kurti, Luan Dalipi, i tha Euronews se qeveria kosovare ka mbajtur komunikim të vazhdueshëm me autoritetet amerikane që prej mesit të muajit korrik.

“Ka shumë punë logjistike e teknike, të sigurisë dhe sociale, që po i trajtojmë me kujdes. ShBA-të janë aleati ynë kryesor dhe partneri ynë strategjik. Gjithçka do të përmbyllet mirë,” – tha Dalipi.

Presidentja e Kosovës, Vjosa Osmani, konfirmoi gjithashtu bisedimet me autoritetet amerikane rreth kësaj çështjeje.

Me një postim në Facebook më vonë gjatë së dielës, Osmani tha se ishte kontaktuar që më 16 korrik nga ambasadori i SHBA në Kosovë, Philip Kosnett, i cili i kishte komunikuar kërkesat e Sekretarit të Shtetit Antony Blinken.

Ajo tha se kishte dhënë pëlqimin për pritjen e zyrtarëve dhe bashkëpunëtorëve afganë “pa asnjë hezitim apo kushtëzim”.

Më herët Kryeministri i Shqipërisë, Edi Rama, konfirmoi gjithashtu se qeveria e tij ka pasur diskutime të ngjashme.

Përmes një postimi në Facebook Rama tha se nuk do t’u thotë jo kërkesave të SHBA për të strehuar zyrtarë apo bashkëpunëtorë të autoriteteve afgane.

Por Rama theksoi se kërkesa ka qenë për pritje të përkohshme sipas një operacioni që mund ta kthejë Shqipërinë në vend tranzit “për emigrantët politikë afganë që do kenë destinacion fundor SHBA-të”.

Pas tërheqjes së trupave amerikane nga Afganistani, grupi i shtetit islamik të talebanëve ka mësyrë strukturat lokale të shumicës së qyteteve. Aktualisht nën kontroll të autoriteteve afgane mbetet vetëm kryeqyteti, Kabuli.

Shumë shtete kanë nisur evakuimin e trupave të tyre diplomatike dhe bashkëpunëtorët e tyre nga Afganistani.

SHBA, Britania e Madhe dhe Gjermania dërguan ushtarë në aeroportin e Kabulit për të ndihmuar me përgatitjen e evakuimeve.

LEXONI GJITHASHTU:

• Cilat shtete në Europë po tërheqin ambasadat e tyre nga Kabuli?
• Qeveria e gatshme të presë emigrantët afganë në Shqipëri
• Talebanët po hyjnë në Kabul nga të gjitha anët, thotë Ministria e Brendshme