Recep Tayyip Erdogan shton masat kundër COVID-19, Turqia pezullon fluturimet ndërkombëtare

Presidenti Recep Tayyip Erdogan, deklaroi se Turqia ka pezulluar të gjitha fluturimet ndërkombëtare për hyrje dhe dalje të pasagjerëve në mënyrë që të pengohet rritja e rasteve të infektuarve nga coronavirusi.

Ky vendim ka ardhur si pasojë e numrit të lartë të personave në Turqi që humbën jetën nga virusi. Shkalla e të prekurve në shtetin turk ka tejkaluar shumicën e vendeve të tjera me më shumë se 2,000 raste në një ditë të vetme. Deri më tani, numërohen gjithsej më shumë se 5,000 raste të infektuar dhe 92 të vdekur gjithsej.

Presidenti u bëri thirrje qytetarëve që të vetëkarantinoheshin si dhe të dilnin nga shtëpia vetëm në raste emergjente. Pas këtij vendimi, ai paralajmëroi se në disa nga qytetet e Turqisë do të mbahen konferenca të ndryshme për të diskutuar rreth masave që do të merren dhe nëse është e nevojshme për t’i ashpërsuar ato edhe më tej.

Duke u përpjekur për të eleminuar virusin,Turqia kufizoi gjithashtu udhëtimet nëpërmjet linjës së autobusave ndërkombëtarë si dhe mbylljet e parqeve.