Kalimi i COVID-19 dhe vaksinimi ofrojnë mbrojtje të dyfishtë, sipas studimit izraelit

Mbrojtja imunitare natyrale që zhvillohet pasi dikush kalon një infeksion me SARS-CoV-2  si dhe marrja e të paktën një vaksine anti-COVID ofrojnë një mburojë shumë të fortë kundër variantit Delta.

Këto ishin përfundimet e një studimi të gjerë izraelit që përfshiu 2.5 milionë njerëz, dhe që u shoqërua me një paralajmërim për të mos u infektuar qëllimisht.

Këto përfundime demonstrojnë fuqinë e sistemit tonë imunitar por ekspertët e sëmundjeve infektive theksojnë se vaksinat kundër COVID-19 mbeten sidoqoftë një mbrojtje e lartë kundër komplikimeve serioze dhe vdekjes. Ata gjithashtu paralajmërojnë se infektimi i qëllimshëm mes njerëzve të pavaksinuar është jashtëzakonisht i rrezikshëm.

Studiuesit shtuan gjithashtu se një nga përfundimet e këtij studimi ishte se njerëzit që kishin kaluar infeksionin COVID-19 dhe kishin marrë një dozë të vaksinës ishin shumë më të mbrojtur ndaj ri-infektimit se sa ata që e kishin kaluar një herë virusin dhe nuk ishin vaksinuar.

“Ne vazhdojmë ta nënvlerësojmë rëndësinë e imunitetit që ofron infektimi natyral … sidomos kur [infektimi] ka ndodhur kohët e fundit,” u shpreh Eric Topol, shkencëtar mjekësor në Scripps Research.  “Dhe kur e përforcon atë, duke marrë një dozë të vaksinës, e çon imunitetin në nivele që nuk mund të arrihen me asnjë lloj vaksine për momentin.”