17 vjet nga triumfi historik i Shqipërisë kundër Greqisë

Data 4 shtator shënon një ngjarje historike për Shqipërinë, të paktën në aspektin sportiv.

Si sot 17 vjet më parë, kuqezinjtë arritën të bënin krenarë sportdashësit pasi mposhtën kombëtaren e Greqisë në shifrat 2:1.

Greqia vinte në Tiranë me petkun e kampiones së Evropës, kampionat ky, i cili u zhvillua në Portugali.

Para ndeshjes, tifozët shqiptarë pritën kombëtaren greke me sloganet “Këtu nuk është Portugali” dhe në fakt ashtu ndodhi pasi helenet u mundën në Tiranë.

Gjatë Kampionatit Evropian askush nuk i kishte mposhtur grekët, por ishte Shqipëria ajo që i rezervoi këtë shije të hidhur.

Golat, të cilët mposhtën kampionët në fuqi të Evropës mbajnë firmën e Ardian Aliajt dhe Edvin Muratit.