Skënder Hyseni: Çështja e të pagjeturve mbetet pezull për faj të qeverisë së Kosovës

Çështja e të zhdukurve të luftës ka vënë në pikëpyetje takimin e kryeministrit Albin Kurti dhe presidentit Aleksandar Vuçiç në fund të shtatorit.

Sipas palës kosovare nuk është vërejtur përparim në këtë drejtim. Skënder Hyseni, ish-kryenegociator për dialogun Kosovë-Serbi thotë se qeveria e Kosovës është fajtore pasi e ka mbajtur pezull këtë çështje.

“Çështja e të pagjeturve mbetet pezull për faj të qeverisë së Kosovës. Ne e kemi trajtuar çështjen e të pagjeturve dhe kemi arritur një marrëveshje në parim, e cila duhej të ishte një nga elementët e marrëveshjes së përgjithshme për njohje reciproke”, tha ai.

Më tej Hyseni theksoi se qeveria Kurti nuk po ofron informacion për takimet e kryera me palën serbe edhe në rikthimin nga e para të çështjes.

“Mua [kjo mungesë transparence] më bën të konsolidoj bindjen se Kurti e Vuçiç kanë qëllim të përbashkët ruajtjen e një gjendjeje të ngrirë në Kosovë, ruajtja e status-quos-ë,” – shtoi Hyseni.

Ish-kryenegociatori e konsideroi gabim shumë të madh të qeverisë Kurti rihapjen e temave të dakorduara më parë në dialogun me Serbinë. Sipas tij kjo situatë është një qëndrim që lidhet me zgjedhjet dhe shkon edhe përtej.

“Kurti nuk e ka hallin e sukseset e Kosovës, e ka hallin te karrigia e tij,” – akuzoi Hyseni, i cili pretendoi se Kryeministri Kurti “nuk ia ka idenë marrëveshjeve të Kosovës”.

Ai madje shkon më tej kur thotë se “ikja nga tryeza e dialogut është dështim dhe kapitullim”.

LEXONI GJITHASHTU: 

• Çështja e të zhdukurve të luftës vë në pikëpyetje takimin Kurti-Vuçiç
• Dialogu në rrezik, pala kosovare refuzon pjesëmarrjen e serbit të shpallur ‘non grata’ në tryezë