Të paktën 14 viktima nga zjarri në spitalin e COVID-19 në Tetovë

Të paktën 14 viktima u konfirmuan nga zjarri i madh që përfshiu mbrëmjen e së mërkurës spitalin e lëvizshëm të Tetovës ku trajtohen pacientët e sëmurë me COVID-19.

Burime nga spitali thonë për Euronews Albania që numri pritet të rritet. Të gjithë trupat janë nxjerrë, por ende nuk mund të jepen informacione deri në momentin e identifikimit të viktimave.

30 zjarrfikës me 7 makina kanë shkuar në vendngjarje dhe flakët janë shuar, por ka qenë i pamundur evakuimi i njerëzve brenda godinës sepse zjarrfikësja ka mbërritur shumë vonë dhe spitali i ndërtuar prej materiali plastik është përfshirë shumë shpejt nga flakët.

Nga informacionet paraprake brenda ndodheshin 24 pacientë të shtruar, 8 persona nga stafi mjekësor dhe disa familjarë të të sëmurëve.

Korrespondenti i Euronews Albania në Maqedoninë e Veriut tha se inspektorë të policisë dhe 5 prokurorë po hetojnë arsyet e zjarrit të madh që për pak minuta shkatërroi gjithë spitalin ambulant në Tetovë.

Nga informacionet paraprake ngjarja ka ndodhur për shkak të një problemi me energjinë elektrike, por ende pritet versioni zyrtar nga autoritetet. Qeveria në RMV do të mbajë një konferencë në orën 10. Nga ana tjetër në godinën e komunës së Tetovës është krijuar një shtab krize.

Në prill të këtij viti ka pasur një deklaratë nga drejtori ekonomik i spitalit të Tetovës se qendra ndihmëse për pacientët me COVID-19 nuk ka kushte të mjaftueshme për t’u kujdesur për pacientët. Për sigurinë e spitalit ka qenë skeptik edhe ministri i Shëndetësisë në RMV, Venko Filipçe.

Spitali ambulant i Tetovës u hap pas muajit prill si strukturë plotësuese për Spitalin Klinik.

LEXONI GJITHASHTU: 

• Përfshihet nga zjarri spitali i COVID-19 në Tetovë, raportohet për viktima