Trajneri i Juventus shpreson ta nisë mbarë Ligën e Kampionëve

Juventus nuk e ka nisur mirë kampionatin në Itali. Në tri ndeshjet e para ka marrë një barazim me Udinesen dhe dy humbje me Empolin dhe Napolin dhe kjo situatë ka lënë shije të hidhur tek tifozët.

Por, përkundër kësaj ecurie negative, trajneri Massimiliano Allegri ka hezituar t’i fajësojë lojtarët e tij duke thënë se ata nuk kishin fat në ndeshjen ndaj Napolit.

“Unë nuk mund t’i qortoj lojtarët e mi për asgjë këtë mbrëmje. Ne bëmë një paraqitje më të keqe kundër Empolit, por sot për fat të keq paguam çmimin për gabimet”, tha Allegri.

Ndryshe nga Seria A, tekniku beson se Juventus do bëjë paraqitje të mirë në Ligën e Kampionëve.

“Shpresojmë se në mund ta fillojmë Ligën e Kampionëve në një mënyrë më të mirë sesa në Serie A. Në këtë moment, ne paguajmë një çmim të rëndë për çdo gabim, por këto momente mund të ndodhin në futboll. Ne duhet të ishim më të mprehtë”, tha ai.

Në klasifikimin e përgjithshëm Juventus renditet tetë pikë pas kryesuesve të kampionatit, Napolit, i cili në tri takimet e para ka siguruar nëntë pikë, por Allegri nuk sheh asnjë problem në këtë aspekt.

“Është një sezon i gjatë, ne duhet të ndjekim skuadrat e tjera dhe ka shumë kohë për t’u rikuperuar. Kam pasur momente më të këqija se këto. Ajo që ka rëndësi tani është e marta, duhet të bëjmë një paraqitje të mirë kundër Malmos, pastaj ne kemi Milanin të dielën.”, tha Allegri.