A do ketë lirim të masave? Manastirliu: Çlirimi i jetës social-ekonomike të shoqërohet nga mbajtja e maskës dhe distanca

Ndërsa këtë javë pritet shqyrtimi i masave kufizuese nga Komiteti i Ekspertëve, Ministrja e Shëndetësisë Ogerta Manastirliu bëri thirrje për kujdes, pasi sipas saj çlirimi i jetës social-ekonomike duhet të shoqërohet nga mbajtja e maskës dhe e distancës fizike.

“Ekspertët tanë të Komitetit Teknik janë duke vlerësuar në mënyrë dinamike masat, por gjithçka do të varet nga ecuria e epidemisë. Çlirimi gradual i jetës social-ekonomike duhet medoemos të shoqërohet nga masat e distancimit fizik, vendosjen e maskës dhe mbajtjen e higjienës, në mënyrë që të mos bëjmë hapa mbrapa dhe të vijojmë të vendosur përpara në këtë kilometër të fundit drejt kthimit në normalitetin aq shumë të dëshiruar,” – tha Manastirliu.

Gjatë fjalës së saj në Kuvend, ministrja ka deklaruar se mbi 100 mijë qytetarë i kanë kryer tashmë të dy dozat e vaksinës, teksa tha se do të vijojë furnizimi me vaksinat anti-COVID në ditët e ardhshme.

Ministrja e Shëndetësisë u shpreh se situata e pandemisë në vend paraqitet e kontrolluar, por bëri apel për qytetarët, që të mos ulin vigjilencën.

Prej fillimit të vaksinimit janë kryer në total 518,679 doza të vaksinës ndaj COVID19, prej të cilave mbi 419,246 vaksinime për persona mbi 60 vjeç.

LEXONI GJITHASHTU: 

• Masat anti-COVID, Komiteti i Ekspertëve vendos rikthimin e nxënësve të sistemit parauniversitar në shkolla
• RMV lehtëson masat kufizuese, restorantet rihapen në ambientet e jashtme, reduktohet ora policore
• Lehtësohen masat anti-COVID në Evropë, Greqia nis vaksinimin e 30-vjeçarëve