A do t’i pengojë karantina të votojnë shqiptarët që jetojnë në Greqi, Tomini: Shëndeti, mbi çdo interes

Zëvendësministrja e Shëndetësisë, Eugena Tomini, tha për Euronews Albania se vendimi i marrë sot nga Komiteti i Ekspertëve për karantinim 2-javor për të gjithë ata që vijnë nga Greqia dhe RMV lidhet me situatën epidemiologjike nga COVID-19 në këto dy vende.

Znj. Tomini u shpreh se vendimi i ekspertëve vlerësohet në mënyrë dinamike, teksa theksoi se grupi i ekspertëve ka qenë shumë rigoroz lidhur me masat shtrënguese, për të kaluar në lehtësimin gradual të tyre.

E pyetur lidhur me ndikimin që mund të ketë kjo masë e fundit tek shtetasit shqiptarë që do të duan të kthehen në atdhe për të votuar, zv.ministrja e Shëndetësisë tha se shëndeti i njerëzve prevalon mbi çdo lloj interesi tjetër, qoftë ky edhe ai i zgjedhjeve.

Sipas zv.ministres rënia e numrit të rasteve të reja me COVID lidhet me masat shtrënguese dhe faktin se popullata është ndërgjegjësuar në mbajtjen e maskës dhe distancimit, por nuk përjashtohet mundësia që të ketë një tendencë rritjeje për shkak të grumbullimeve elektorale.