A ka vdekur ‘fenomeni kanabis’? Përgjigjet ish-ministri Lleshaj

Ish-ministri i Brendshëm Sandër Lleshaj tha për Euronews Albania se “fenomeni kanabis ka vdekur” pavarësisht se në zona të caktuara ende ka kultivim të bimëve narkotike.

Gazetari Eni Ferhati i drejtoi pyetjen nisur nga parcela e fundit që u asgjësua në Kune Vain, Lezhë shumë afër një zone të mbrotjur.

Sipas tij deklaratat e njëpasnjëshme të qeverisë se “fenomeni i kanabisit ka vdekur” nuk përkojnë me situatën aktuale në terren.

“Është evidente që fenomeni si i tillë nuk është më në atë nivel shqetësimi që ka qenë, fenomeni ka vdekur në një farë mënyre, por kanë ngelur gjallë rastet. Rastet ju i ndeshni përditë në Angli, në Spanjë, në Francë, në Greqi, në Itali, gjithandej. Kjo është një luftë e pandalshme e krimit me ligjin,” – u përgjigj Lleshaj.

Ndërkohë gazetari Ferhati vuri në pikëpyetje nëse policia ka respektuar në mënyrë të mirëfilltë masat ndërsa asgjësoi parcelën me kanabis, ku më pas mbeti i vrarë nënkomisari Saimir Hoxha.

“Në kohën kur zoti Lleshaj drejtonte ministrinë e Brendshme u vu një udhëzim i ri, që për çdo parcelë kanabis që evidentohej duhej lajmëruar Shërbimi për Kontrollin e Brendshëm. Të paktën deri në këto momente nuk e dimë a janë ndjekur këto hapa,” – u shpreh Ferhati.

LEXONI GJITHASHTU: 

• ‘Ka shumë drejtorë’, ish-ministri Lleshaj: Policia duhet të hyjë në një fazë të re reformimi
• Vrasja e nënkomisarit, Sandër Lleshaj: Të mos merremi vetëm me policinë, vrasësi është produkt i shoqërisë