FSHF nis hetimin për Bylis-Tirana, kërkohet verifikim nga ‘Sport Radar’ për baste të dyshimta

Federata Shqiptare e Futbollit ka nisur hetimet për ndeshjen gjysmëfinale të Kupës së Shqipërisë mes Bylisit dhe Tiranës, e zhvilluar pasditen e së enjtes.

Kjo përballje ngjalli hije dyshimi, për mënyrën se si kryesuesit e kampionatit u përmbysën në pjesën e dytë të lojës, në harkun kohor të pak minutave, ndaj një kundërshtari që krijonte raste të njëpasnjëshme deri në momentin që arriti të shënonte dy herë. 

Klubi i Tiranës hodhi poshtë akuzat përmes një postimi në Facebook, por Federata Shqiptare ka njoftuar se ka kërkuar informacion nga kompania “Sport Radar” nëpërmjet UEFA-s, për të mësuar nëse ka pasur baste të dyshimta për këtë takim.

Federata bën me dije se, ka nisur hetimin për këtë çështje dhe po grumbullon materialet e nevojshme dhe do te ketë vendimmarrje, në rast se do të ketë prova.