Abuzime me regjistrimin e pronave, arrestohet juristi i Kadastrës Durrës dhe 3 të tjerë

Arrestohen 4 persona në Durrës, pasi dyshohet se kanë abuzuar me regjistrimin e pronave.

Gazetari i Euronews Albania, Eni Ferhati raporton nga hetimet e Prokurorisë së Durrësit,  mes personave të arrestuar është juristi i Kadastrës së këtij qyteti, Mikel Zaho.

Ndërsa, personat e tjerë të arrestuar janë Ilias Fisheku, Giraon Aliko dhe Rakip Haxhiu.

Për këtë të fundit, Gjykata e Durrësit ka caktuar masën  e sigurisë “arrest shtëpie”, ndërsa të 3 të tjerët masën e “arrestit me burg”.

Në dosjen hetimore saktësohet se të katër personat në bashkëpunim me njëri-tjetrin, me dokumente të falsifikuara, kanë aplikuar dhe regjistruar në Kadastër një pasuri të paluajtshme prej 2 mijë metrash tokë truall dhe një ndërtesë prej 550 metrash, në zonën bregdetare fshati Vrinjë, njësia Administrative Rashbull.

Toka e regjistruar ka qenë pronë shtetërore.

Javët e fundit pas hetimeve të Prokurorisë së Posaçme janë arrestuar disa zyrtarë të lartë për akuzën “shpërdorim detyre”.

Më 6 korrik, me urdhër të SPAK u arrestua kryetari i Bashkisë së Lushnjës, Fatos Tushe, i cili akuzohet për “shpërdorim detyre në bashkëpunim”.

Katër ditë më vonë, u arrestuan me urdhër të SPAK, 9 zyrtarë dhe ish-zyrtarë të Ministrisë së Brendshme për abuzimet me një tender për uniformat në Policinë e Shtetit.

Ndërkohë ish-zv. Ministrja e Brendshme, Rovena Voda, po hetohet në masën e sigurisë “arrest shtëpie” me kërkesë të SPAK. Ish-zyrtarja akuzohet për ushtrim të ndikimit të paligjshëm ndaj personave që ushtrojnë funksione publike.

LEXONI GJITHASHTU:

• Arrestohet kryetari i Bashkisë së Lushnjës, Fatos Tushe
• Arrest shtëpie për ish-zv.ministren e Brendshme, Rovena Voda