Abuzimi me 15-vjeçaren, deputeti: Riktheni dënimin me vdekje, kush prek fëmijët të varet në mes të qytetit

“Kush prek fëmijët duhet të varen në mes të qytetit”. Kjo ishte deklarata e deputetit të opozitës parlamentare Halit Valteri.

Në fjalën e tij ai i kërkoi kryetarëve të grupeve parlamentare që të marrin një vendim për të kthyer dënimin me vdekje duke u shprehur se konventat që ka ratifikuar Shqipëria për të hequr dënimin me vdekje e kanë lënë mbrapa ndëshkimin e këtyre krimeve.

Ai theksoi se dalja nga këto konventa nuk do ta pengojë rrugën integruese të vendit.

Kryetari i Kuvendit, Gramoz Ruçi në përgjigje të qëndrimit të deputetit opozitar, u shpreh se e kuptonte indinjatën për rastin në fjalë, por se vendi nuk mund të dalë nga konventa që ka ratifikuar.

Krahas kësaj, Ruçi bëri të ditur se për ngjarjen e rënë të ndodhur para pak ditëve do të ketë edhe një fjalë ministrja e Arsimit, Besa Shahini.