Administrata Trump pretendon se lufta me Iranin “ka përfunduar”

Agjencitë e lajmeve Associated Press (AP) dhe Reuters raportojnë se administrata Trump po argumenton se lufta në Iran ka mbaruar, për shkak të armëpushimit që nisi në fillim të prillit, ka do të thotë se presidenti nuk ka nevojë të kërkojë miratimin e Kongresit për veprime ushtarake.

Armiqësitë me Iranin, që filluan në shkurt, kanë “përfunduar”, tha një zyrtar i lartë i administratës Trump për Reuters të enjten vonë.

“Të dyja palët ranë dakord për një armëpushim dyjavor të martën, më 7 prill, i cili është zgjatur që atëherë”, tha zyrtari. “Që nga e marta, më 7 prill, nuk ka pasur shkëmbim zjarri midis Forcave të Armatosura të SHBA-së dhe Iranit.”

Duke u mbështetur në këtë arsyetim, administrata ende nuk e ka përmbushur kërkesën e përcaktuar nga Rezoluta e Pushteteve të Luftës e vitit 1973, një ligj që përcakton se presidenti duhet të kërkojë miratim formal nga Kongresi për veprime ushtarake që zgjasin më shumë se 60 ditë, raportoi AP.

Sipas kësaj rezolute, Trump kishte afat deri të premten, dita e 60-të e luftës — për të kërkuar autorizimin e Kongresit për luftën kundër Iranit ose për të ndërprerë luftimet.

AP raportoi se demokratët e kanë shtyrë Trumpin të kërkojë miratim formal për luftën me Iranin, ndërsa afati 60-ditor po shihej si një pikë kthese për një numër të madh ligjvënësish republikanë, të cilët kishin mbështetur veprime të përkohshme kundër Teheranit, por këmbëngulnin në përfshirjen e Kongresit për një angazhim më afatgjatë.