Axhenda e Kushtetueses, Tusha: Qëndrimi im në detyrë nuk lidhet me shortin e KED

Pas plotësimit me 3 gjyqtarë të rinj, 7 gjyqtarët e Gjykatës Kushtetuese zhvilluan mbledhjen e parë më 29 dhjetor.

Por këtë javë pritet të zhvillohet sërish mbledhja e gjyqtarëve, me rend dite shqyrtimin e çështjeve që sipas ligjit i përkasin për kompetencë, por edhe për të kryer veprimet e nevojshme përgatitore dhe organizative për rifunksionimin e Gjykatës.

Euronews Albania kontaktoi me anëtaren Vitore Tusha, të cilës i ka mbaruar mandati, por prej janarit të vitit 2019 ushtronte funksionin e zëvendëskryetares së Këshillit të Emërimeve në Drejtësi, si dhe ushtron kompetencat e kryetarit të Gjykatës Kushtetuese. Tusha thotë se mos rizgjedhja e saj në KED nuk prek vijimin e detyrës.

“Qenia ime në detyrë nuk lidhet me shortin për Këshillin e Emërimeve në Drejtësi, ku pas 3 viteve këtë herë nuk më ra gogla. Unë jam në detyrë dhe do të qëndroj sipas parashikimeve ligjore deri në plotësimin e vakancave, që duhet të vijnë nga radhët e gjyqtarëve të Gjykatës së Lartë”, tha znj. Tusha.

Plotësimi me 9 anëtarë i Kushtetueses tashmë varet nga ngritja e Gjykatës së Lartë, e cila pasi të bëhet me 15 anëtarë, mund të propozojë 3 emrat për në Gjykatën Kushtetuese.  

Lexoni gjithashtu:

Hazizaj: Gjykatë Kushtetuese nga halli, shqyrtimi i ankimimit të opozitës për Kodin, sinjali i parë i dinjitetit