Akademiku Andi Hoxhaj merr çmimin si pedagog i ekselencës në Britaninë e Madhe

Univeriteti i Warwick në Britani të Madhe ka vlerësuar 20 pedagogë me çmimin “Warwick për mësimdhënie të ekselencës”, mes tyre studiuesin dhe pedagogun e “Të Drejtës Europiane dhe Politikave të BE”, në Fakultetin e Drejtësisë, Andi Hoxhaj.

Kjo përzgjedhje u bë pas 400 nominimeve dhe rekomandimeve të studentëve për pedagogët dhe stafin e tyre pedagogjik.

Për këtë vlerësim, vetë Andi Hoxhaj u shpreh se ndihet i nderuar.

“Ky vit na ka mësuar se është thelbësore që ne të krijojmë ura komunikimi të shëndetshme për të punuar sa më ngushtë me studentët dhe kolegët tanë, dhe të krijojmë një mjedis të sigurt ku studentët të jenë në gjendje të ndajnë sfidat e tyre me ne si pedagogë”, – u shpreh pedagogu.

Andi Hoxhaj, ka përfunduar me sukses doktoraturën në mars të vitit 2017. Ai është autor i një libri të titulluar “Politikat e BE-së për luftën kundër korrupsionit”, publikuar në gjuhën angleze në vitin 2020 dhe i disa botimeve shkencore në fushat e jurisprudencës, integrimit të BE-së, sundimit të ligjit dhe anti-korrupsionit.

Sakaq, Hoxhaj është i pari shqiptar që është nderuar nga Akademia e Shkencave Britanike me çmimin prestigjioz “British Academy Rising Star Engagement Award” në vitin 2018, për kontributin e dhënë në studimet kundër korrupsionit dhe sundimit të ligjit, me fokus të veçantë në Ballkanin Perëndimor, Evropë dhe Britaninë e Madhe.

LEXONI GJITHASHTU:

• Si mund të bashkëpunojë Evropa me refugjatët për të dalë nga kriza e pandemisë
• Protestë në mbrojtje të emigrantëve në kufirin Kroaci-Bosnje: Të ndalet dëbimi i tyre i dhunshëm
• Dritë jeshile për t’u martuar, në Itali nisin të organizohen dasmat por me masa strikte