Aksident i frikshëm në Bahrain, makina e Romain Grosjean përplaset pas nisjes dhe shpërthen në flakë

Gara për çmimin e madh të Bahreinit për pak sa nuk u kthye në një tragjedi të vërtetë, pasi një aksident i frikshëm u regjistrua në fillimin e garës. 

Vetëm pak sekonda pas nisjes, Romain Groszho u përplas me barrierat metalike, duke bërë që makina të ndahej në dysh dhe të përfshihej nga flakët.

Fatmirësisht piloti doli nga makina në kohë dhe ja hodhi vetëm me disa dëmtime të lehta, pavarësisht se përplasja ishte mjaft e rrezikshme. Pas një pritje relativisht të gjatë, pasi u ndryshuan dhe barrierat e dëmtuara, gara rinisi.

Hamilton arriti që të kalonte i pari vijën e finishit, duke regjistruar suksesin e 95-të në karrierë. Pas britanikut u pozicionuan dy pilotët e Red Bull Max Verstappen dhe tailandez Alexander Albon. 

Hamilton ka fituar pesë garat e fundit dhe 11 nga 15 garat e këtij edicioni dhe ka arritur ta sigurojë titullin e shtatë kampion bote që pas çmimit të madh të Turqisë. Piloti tjetër i Mercedes, Valteri Botas nuk shkoi më larg se vendi i tetë, ndërsa dy pilotët e Ferrarit Leclerc dhe Vettel u pozicionuan respektivisht në vendin e 10-të dhe të 13.