Aksident rrugor në Elbasan, të paktën pesë të plagosur

Një aksident rrugor ka ndodhur mbrëmjen e sotme në Bradashesh të Elbasanit. Nga të dhënat paraprake bëhet me dije se një automjet tip “Volkswagen” është përplasur me një minibus dhe për pasojë të paktën pesë persona kanë mbetur të plagosur.

Të plagosurit janë nisur me urgjencë drejt Spitalit të Elbasanit, ndërsa fatmirësisht ndodhen jashtë rrezikut për jetën.

Gazetari i Euronews Albania Merin Maçi raporton se aksidenti ka ndodhur në momentin që drejtuesja e “Volkswagen” është futur në parakalim, por kjo manovër nuk ka shkuar sipas përllogaritjes, dhe për pasojë ka goditur minibusin, i cili ishte duke lëvizur në korsinë e vet.

Policia dhe grupi hetimor kanë shkuar në vendngjarje dhe po punojnë për zbardhjen e shkaqeve.