Fillimi i vitit 2021 ka shënuar një bilanc tragjik viktimash si pasojë e aksidenteve rrugore.

Vetëm në 3 javët e të janarit janë shënuar 9 aksidente fatale, ku kanë humbur jetën 12 persona.

Për situatën e aksidenteve në vend, eksperti rrugor zoti Islam Qibini u shpreh në Euronews Albania se drejtuesit e mjeteve nuk zbatojnë rregullat e qarkullimit dhe ecin me shpejtësi të lartë.

“Kemi rritje të djeshme kohët e fundit të aksidenteve automobilistike me pasoja për jetën dhe shëndetin e qytetarëve. Kjo ka ndodhur për shkak të rritjes së fluksit në akset rrugore. Kemi rritje të shpejtësisë mbi normat e lejuara dhe mos zbatim të rregullave të qarkullimit rrugor nga ana e drejtuesve të mjeteve”, tha ai

“Kohët e fundit kemi pasur kushte atmosferike të këqija, reshje, dëborë dhe ngrica në akse të rrugës. Kjo ka bërë që shumë drejtues mjetet kanë humbur kontrollin e mjeteve”, shtoi ai më tej.

Zoti Qibini theksoi më tej se shumë drejtues mjetesh nuk ka aftësitë e duhura për të drejtuar makinat e tyre.

“Shumë drejtues mjetesh nuk kanë aftësitë e duhura personale, teknike në një situatë”, tha ai.

“Policia Rrugore duhet të përqendrojë masat administrative ndaj atyre lloj kundra-vajtjeve që janë burim aksidenti, jo ndaj kundra-vajtjeve që janë anësore”, u shpreh eksperti rrugor.

Sipas zotit Qibini, Policia Rrugore duhet të fokusohet tek shoferët që janë problematikë.

“Policia Rrugore duhet të fokusohet tek ata drejtues mjetesh që janë problematikë”, tha ai.