Aksioni kundër pallateve pa leje, qeveria ‘e dorëzon’ te IKMT e policia: S’ndërhyjmë

Aksioni për konfiskimin e ndërtimeve pa leje ka ngecur. Nga Qeveria përditësimi i fundit për vijimin e tij është dalja publike e ministrit të Brendshëm, Bledi Çuçi rreth dy javë më parë.

Ky ishte konfiskimi i dytë dhe i fundit publik. Euronews Albania pyeti përfaqësuesit e Qeverisë se në çfarë faze është operacioni. Pyetjes iu përgjigj ministrja Ogerta Manastirliu.

“Duhet që të kuptojmë diçka që është me rëndësi; ne nuk kemi ndërhyrë dhe nuk do të ndërhyjmë në vendimet e organeve ligjzbatuese kompetente. Vendim i Qeverisë ka për synim thelbësor dekurajimin e ndërtimeve pa leje në Shqipëri”, u shpreh ministrja.

Organet ligjzbatuese të këtij vendimi janë Inspektorati Kombëtar i Mbrojtjes së Territorit dhe Policia e Shtetit.

Sipas kësaj deklarate të ministres Manastirliu, qeveria e ka dorëzuar aksionin te këto dy struktura, të njëjtat që nuk duhet të kishin lejuar ndërtimin e tyre.

Paralelisht me konfiskimin në fillim të shtatorit u njoftua edhe nisja e hetimeve për nxjerrjen e zyrtarëve përgjegjës që nuk zbatuan ligjin. As për ecurinë e këtyre hetimeve nuk ka një njoftim nga Qeveria.

LEXONI GJITHASHTU:

• Ku ngeci konfiskimi i pallateve pa leje? Qeveria bie në heshtje pas aksionit 3-ditor
• Ndërtimet dhe katet shtesë pa leje, Tabaku: Përgjegjësit janë në qeveri dhe bashki