Aktakuza për krime lufte, Kadri Veseli del sot para Gjykatës së Hagës

Ditën e sotme në orën 15:00 do të zhvillohet seanca e parë në Gjykatën e Hagës ndaj Kadri Veselit, kreu i Partisë Demokratike të Kosovës.

Aktakuza kundër Kadri Veselit u konfirmua më 26 tetor 2020. Ai u arrestua nga Zyra e Prokurorit të Specializuar më 5 nëntor 2020 dhe u transferua në objektin e paraburgimit të Dhomave të Specializuara të Kosovës në Hagë në të njëjtën ditë.

Ndërsa, ditën e nesërme, në orën 11:00, do të mbahet paraqitja e parë e Rexhep Selimit në sallën e gjyqit të Dhomave të Specializuara të Kosovës në Hagë.

Një ditë më parë në këtë gjykatë u paraqitën, ish-presidenti Hashim Thaçi dhe ish-kreu i Kuvendit të Kosovës, Jakup Krasniqi. Ish-krerët e UÇK-së mohuan të gjitha akuzat dhe deklaruan se janë të pafajshëm.

Sipas aktakuzës, veprat që rëndojnë ndaj Thaçit, Veselit, Selimit dhe Krasniqit kanë të bëjnë me krime lufte, ndalim të paligjshëm ose arbitrar, trajtim mizor, torturë dhe krime kundër njerëzimit,  të cilat, sipas Dhomave të Specializuara, janë kryer midis marsit të vitit 1998 dhe shtatorit 1999.