Akuzat e PD për nxjerrjen e të dhënave personale nga e-Albania, SPAK nis verifikimet

Prokuroria e Posaçme kundër Korrupsionit dhe Krimit të Organizuar, SPAK ka nisur verifikimet për nxjerrjen e të dhënave personale përmes portalit të e-Albania, pas akuzave një ditë më parë nga Partia Demokratike.

Burime zyrtare nga SPAK thonë se janë duke verifikuar nëse ky database është vënë në funksion të fushatës elektorale për zgjedhjet e 25 prillit. Mësohet se SPAK do të marrë kopje të të dhënave të e-Albania për të verifikuar nëse janë të njëjta me ato të publikuara.

Një ditë më parë Partia Demokratike hodhi akuza ndaj Partisë Socialiste, se është duke përdorur për qëllime elektorale të dhënat që qytetarët kanë depozituar në portalin qeveritar e-Albania.

Me anë të një daljeje për mediet, ish-deputeti i PD, Enkelejd Alibeaj e cilësoi këtë histori si një shkelje të rëndë që cenon privatësinë e qytetarëve. Për këtë arsye, ai theksoi se PD po përgatitet që të dorëzojë një padi ne SPAK.

Nga ana tjetër, në një reagim zyrtar për Euronews Albania, Agjencia Kombëtare e Shoqërisë së Informacionit hodhi poshtë akuzat.

“Agjencia Kombëtare e Shoqërisë së Informacionit garanton qytetarët shqiptarë se në asnjë rrethanë të dhënat e disponuara nga AKSH-i as nuk janë përdorur, po as nuk mund të përdoren teknikisht nga partitë politike ose vetë qeveria për qëllime politike apo elektorale”, thekson AKSHI.

Lexoni gjithashtu:

Përdorimi i të dhënave, PD përgatit padi në SPAK ndaj E-Albania, AKSHI: Akuza të pabaza