Akuzat e Speciales, gazetari Kushtrim Sadiku: Damkë e madhe për Kosovën

Akuzat e ngritura nga Zyra e Prokurorisë Speciale në adresë të Presidentit Hashim Thaçi dhe kreut të PDK-së, Kadri Veseli për vrasje dhe tortura gjatë luftës në Kosovë është shoqëruar me reagime të shumta.

Gazetari Kushtrim Sadiku akuzat e djeshme i cilësoi si një tërmet politik për Kosovën, pasi sipas tij u minua një proces në të cilin kishin investuar vetë Shtetet e Bashkuara të Amerikës.

“Padyshim ka qenë një tërmet politik ajo që ka ndodhur një ditë më parë. Ka qenë e papritur për secilën palë jo vetëm politike, mediatike , por edhe shoqërisë civile ajo që ka ndodhur një ditë më parë. Kjo ka shkaktuar minim dhe ka sjellë dështimin e një takimi të rëndësishëm, i sponsorizuar nga SHBA. Kjo është një damkë e madhe të Kosovë”, tha ai.

Ai shtoi se ky zhvillim i papritur ka çuar dialogun mes dy shteteve në pikën zero.

 “Procesi i dialogut ka shkuar në pikën zero. Nuk është vetëm dështimi i takimit të Uashingtonit me 27 qershor, por është shumëçka që mund të ndodh. Ka pasur pothuajse secilën herë qëndrime të ndryshme BE-SHBA se si mund të zgjidhet kjo çështje. Ka pasur përplasje”, tha ai.