Albin ​Kurti: Nuk mund të ketë amnisti për krimet dhe dhunën seksuale

Kryeministri Albin Kurti ka reaguar pas dënimit me dhjetë vjet heqje lirie të policit serb Zoran Vukotiç për krime lufte në Kosovë.

Ai thekson se dhuna seksuale gjatë viteve 1998-99 është përdorur nga serbët si mjet lufte në Kosovë dhe se mijëra gra e burra kanë qenë viktima të këtij krimi.

“Sot, pas 23 vjetësh pandëshkueshmëri për krimin e dhunës seksuale, për herë të parë dënohet dikush. Zoran Vukotiçi është dënuar me 10 vjet burgim për rastin e ushtrimit të dhunës seksuale ndaj një gruaje shqiptare në Vushtrri”, shkruan Kurti.

Shefi i qeverisë kosovare thotë se viktimat e dhunës seksuale kanë nevojë për drejtësi dhe mbështetje shoqërore.

“Drejtësia është e domosdoshme, edhe në momente si ky kur vjen shumë vonë. Viktimat e dhunës seksuale kanë nevojë për drejtësi, por edhe për përkrahjen tonë shoqërore për të luftuar stigmën që i përcjellë”, ka shkruar Kurti.

Ai thekson se krimet të tilla, që serbët kanë kryer në Kosovë nuk duhet të përfitojnë nga amnistia.

“Krimet e luftës nuk parashkruhen, dhe nuk mund të kenë amnisti për këtë krim të kryer gjatë luftës në Kosovë, këtë armë lufte të përdorur nga okupatori”, shtoi Kurti.

LEXONI GJITHASHTU: 

• Dënohet për abuzim seksual ish-polici serb në Kosovë