Albin Kurti: Pa u zgjidhur çështja e të pagjeturve, nuk diskutojmë me Serbinë tema të tjera

Kryeministri i Kosovës, Albin Kurti thotë se tema kryesore, e cila nuk duhet vonuar për të gjetur zgjidhje në dialogun me Serbinë është ajo për të pagjeturit.

“Ka vetëm një temë që nuk pret, është çështja e të pagjeturve, e të zhdukurve me dhunë gjatë luftës dhe kjo me siguri se do të diskutohet në Bruksel, ndërkaq për çështjet e tjera ne kemi dhënë propozimet tona që natyrisht nuk janë pranuar”, tha Kurti.

Shefi i ekzekutivit të Kosovës paralajmëroi se aktualisht mund të hapen tema diskutimi mes Kosovës e Brukselit, por jo me Serbinë.

“Mund të hapen tema diskutimi ndërmjet Kosovës dhe Brukselit mirëpo jo edhe me Serbinë”, tha ai, duke nënkuptuar qëndrimin e palëkundër të Kosovës mbi çështjet e parashtruara në tryezën e dialogut.

Ai tha se takimet e dy ditëve të fundit të ekipeve të Kosovës dhe Serbisë në Bruksel janë takime përgatitore për dialogun, që sipas tij do të ketë kapitull të ri.