Albin Kurti: Serbia të njohë pavarësinë e Kosovës dhe të ballafaqohet me të kaluarën

Kryeministri i Kosovës, Albin Kurti në samitin e gjashtë shteteve të Ballkanit Perëndimor të organizuar nga kancelari austriak, Sebastian Kurz, ka deklaruar se Kosova dhe Serbia duhet të bëjnë një deklaratë të përbashkët të paqes me kushtin, që të mos-sulmojnë  njëra-tjetrën dhe të zbatojnë reciprocitetin sa i përket të drejtave të pakicave.

Sipas Kurtit, Serbia duhet të përgatisë terrenin për të njohur pavarësinë e Kosovës dhe të ballafaqohet me të kaluarën.

“Kosova dhe Serbia të bëjnë një deklaratë të përbashkët të paqes me zotim për mos-sulmim, Serbia ta njohë pavarësinë e Kosovës dhe të ballafaqohet me të kaluarën, si dhe Kosova e Serbia të zbatojnë reciprocitetin sa i përket të drejtave të pakicave”, shkruan Kurti.

Në shënimin e tij, z. Kurti i ka kërkuar sërish Bashkimit Evropian të liberalizojë vizat, me qëllim që qytetarët të lëvizin lirisht në zonën “Schengen”.

“Të hiqen vizat për Kosovën në mënyrë që qytetarët tanë të udhëtojnë lirshëm në vendet e BE-së, kurse gjashtë shtetet e Ballkanit Perëndimor të kalojnë nga CEFTA në SEFTA (Marrëveshja Evropiane për Tregti të Lirë me Evropën Juglindore) sipas shembullit të EFTA-EEA, pra siç e kanë Lihtenshtajni, Norvegjia e Islanda me BE-në”, shkruan ndër të tjera Kurti.