Albin Kurti: Sulmet në veri të Kosovës nuk do tolerohen, të nxitura nga Serbia

“Sulmet e tilla zjarrvënëse dhe kriminelët që i bëjnë ato, nuk do të tolerohen”. Kështu ka deklaruar kryeministri Albin Kurti në lidhje me ngjarjen në veri të Kosovës për reciprocitetin me targat.

Nëpërmjet një postimi në Facebook, ai thekson se këto veprime po nxiten dhe mbështeten nga Serbia dhe regjimi autokrat atje.

“Fatkeqësisht, para syve të bashkësisë ndërkombëtare, Serbia po përdorë qytetarë të Kosovës për të provokuar konflikt serioz ndërkombëtar”, nënvizon ai.

Kryeministri është shprehur se ngjarja në Qendrën e Regjistrimit të Automjeteve në Zubin Potok ishte e qëllimshme.

“Edhe në Zveçan kanë hedhur dy bomba dore, po ashtu në ndërtesën e qendrës së njëjtë për regjistrimin e automjeteve, por ato fatmirësisht nuk kanë eksploduar. Individë ose grupe të cilave sundimi i ligjit dhe rendi e siguria publike ua rrezikon aktivitetin kriminal po e sulmojnë shtetin tonë dhe po e cenojnë paqen”, shprehet ai.

Ai shton se Policia e Kosovës është institucion profesional që duhet respektuar nga të gjithë.

“U bëj thirrje qytetarëve, sidomos në veri të Ibrit, pavarësisht a janë serbë, shqiptarë, boshnjakë apo romë, që ta ruajnë qetësinë dhe të bashkëpunojnë me institucionet e Kosovës”, thotë ai.

LEXONI GJITHASHTU:

• Serbët sulm me granata në veri të Kosovës, shkak reciprociteti për targat
• Shqiptarët dhe serbët kundër reciprocitetit për targat
• ​Reciprociteti për targat konsiderohet vendim strategjik që e fuqizon Kosovën